«Ижтимоий фикр» жамоатчилик фикрини ўрганиш маркази томонидан аҳоли ўртасида «Фуқаролар давлат бошқаруви ва маҳаллий ҳокимият органлари фаолиятининг самарадорлиги тўғрисида» мавзусида сўровнома ўтказилди. Бу ҳақда марказ матбуот хизмати хабар бермоқда.
Ўзбекистонликларнинг кўпчилиги Ўзбекистон Республикаси Президенти Шавкат Мирзиёев томонидан 2017—2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси доирасида «Халқ билан мулоқот ва инсон манфаатлари йили»да қўйилган вазифаларни узлуксиз амалга ошириш давлат бошқаруви ва маҳаллий ҳокимият органлари ишининг ҳамда фуқароларнинг фаровонлиги ва умуман, ҳаёт сифатини яхшилашга ёрдам беришига ишонч билдирган.
Ҳар иккинчи респондент (51,2%) «жойлардаги ижроия ҳокимият органлари фаолияти ҳақидаги ахборот очиқ ва ундан фойдаланиш мумкин», деб ҳисоблайди. Тўрт чорак мобайнидаги сўровлар натижалари мониторингининг кўрсатишича, ушбу кўрсаткич 10,5 фоизга ўсган (1 чоракдаги 40,7 фоиздан 2017 йил 4 чорагидаги 51,2 фоизгача).
Сўровнинг кўрсатишича, фуқароларнинг кўпчилиги (81,4%) мамлакатда ҳуқуқбузарликларнинг олдини олиш ва уларни бартараф қилишга қаратилган самарали чоралар кўрилмоқда, деб ҳисоблайди ҳамда давлат ҳокимияти ва бошқаруви органларининг жиноятчиликка қарши курашиш бўйича фаолиятидан қониқиш ҳосил қилади. Ўзбекистонликларнинг 80,6 фоизи фуқароларнинг хавфсизлиги, ҳуқуқлари, эркинликлари ва қонуний манфаатлари таъминланганлигини юқори баҳолади.
Тадқиқот фуқароларнинг 78,5 фоизи пенсиялар, стипендиялар ва нафақаларнинг ўз вақтида тўланиши бўйича кўрилаётган чораларнинг натижасидан қониқишларини аниқлади.
Изоҳ (0)