Жаҳонга машҳур хонанда Энрике Иглесиаснинг Тошкентдаги концерти россиялик миллиардер Алишер Усмоновнинг кўмагида бўлиб ўтади. Бу ҳақда «Nuz.uz» хабар бермоқда.
Энрике Иглесиаснинг Тошкентдаги концерти 28 декабрь куни «Истиқлол» санъат саройида бўлиб ўтиши режалаштирилган (шу сабаб таниқли сўз устаси Обид Асомовнинг уч кунлик концертидан бир куни 2018 йилга ўтиб кетди).
Аввалроқ «Истиқлол» санъат саройи директори Исроил Ғуломов концертга чипталар сотилмаслиги, унга томошабинлар фақат таклифнома асосида киритилиши ҳақида «Дарё»га маълум қилган эди.
«Nuz.uz» хабарига кўра, испаниялик хонанданинг концерти чипталари Маданият вазирлиги ва Ёшлар Иттифоқи, шунингдек, бошқа жамоат ташкилоти ва Меҳрибонлик уйлари орқали иқтидорли, фаол ёшларга тарқатилади.
Бундан ташқари, ўқишда ва жамоатчилик ишларида маълум бир ютуқларга эришган ўқувчи ва талабалар ҳам Энрике Иглесиаснинг концерти чипталарини қўлга киритишлари мумкинлиги айтилмоқда.
Аввалроқ россиялик миллиардер Алишер Усмонов бошқа таниқли хонандалар — Робби Уильямс ва Хосе Каррерасларнинг Тошкентдаги концертларини уюштиргани айтилган эди.
Изоҳ (0)