Бокс бўйича Жанубий Корея терма жамоаси пойтахт Тошкентга ташриф буюрди. Бундан кўзланган асосий мақсад, 2017 йил якунларига кўра Осиёнинг энг яхши бокс мамлакати деб топилган Ўзбекистон спортчилари билан машғулот ўтказиш.
Ўзбекистон бокс федерацияси ниманинг эвазига Осиёда тенгсиз бўлди?
Ўзбекистон бокс термаси устози Тўлқин Қиличевнинг «Дарё»га маълум қилишича, айни пайтда ҳар икки мамлакат спортчилари Янгиобод ўқув базасида машғулот олиб бормоқда. Профессионал боксда фаолиятини давом эттиришни истаганлардан Шаҳрам Ғиёсов ҳамда Мурод Аҳмадалиев йиғинда иштирок этмаяпти. Бунгача Рио қаҳрамонларидан Фазлиддин Ғоибназаров ҳамда Рустам Тўлаганов проф рингга ўтиб, АҚШга жўнаб кетганди.
Маълум бўлишича, яқин орада Баҳодир Жалолов ҳамда Элнур Абдураимов ҳам терма жамоани тарк этиши мумкин. Улар ҳам катта эҳтимол билан фаолиятини профессионал боксда давом эттиради. Яқиндагина якунига етган Ўзбекистон чемпионати ғолиблари эса секин-аста уларнинг ўрнини эгаллайди.
Ҳасанбой Дўстматов, Исроил Мадримов, Бектемир Мелиқўзиев, Санжар Турсунов каби Жаҳон Чемпионати иштирокчилари кореялик боксчилар билан бирга машғулот олиб бормоқда. Айни пайтда ҳар икки делегация 2018 йил Индонезияда бўлиб ўтадиган Осиё Ўйинларига тайёргарлик кўриши керак.
Ўзбекистон бокс федерацияси Осиёда энг яхшиси, Шаҳрам Ғиёсов эса йил спортчиси деб топилди
Маълумот учун. Жанубий Корея бокс терма жамоаси Ўзбекистон мустақиллигига қадар Осиёда катта обрўга эга бўлган. Кореяликлар ўз тарихида 11 бор Осиё Чемпионатини умумжамоа ҳисобида пешқадам сифатида якунлай олган. Икки бор улар қитъа чемпионатида жами 8 та олтин медални қўлга киритишга эришган.1994 йилдан бошлаб эса гегемонлик Қозоғистон ва Ўзбекистон қўлига ўтди. Рио—2016 Олимпиадасида қадар қозоғистонлик спортчиларнинг натижаси нисбатан яхшироқ бўлса, Бразилиядаги Олимпиададан кейин Ўзбекистон шоҳсупани ўзиники қилиб олди. 2017 йилги Осиё Чемпионатида 9 та олтин медални қўлга киритган Ўзбекистон терма жамоаси бу борада қитъа рекордини ўрнатди.
Шу йил Гамбургда ўтган Жаҳон Чемпионатида эса ўзбекистонлик спортчилар Кубадан кейин иккинчи бўла олганди. Бу Осиё мамлакатлари орасида биринчи натижа ҳисобланади. Шундан келиб чиқиб, Жанубий Корея делегацияси айнан ўзбекистонликлар билан ҳамкорликда ишлашни лозим деб топди. Бунгача Англия бокс терма жамоаси ўзбекистонлик чарм қўлқоп усталари билан спаринг машғулотлар олиб борганди.
Изоҳ (0)