Мажбурий ижро бюроси Зарбдор туман бўлими томонидан ўтказилган хатлов натижаларига кўра «Зарбдортумангаз» филиали мансабдор шахслари 2017 йилнинг 6 ойи давомида юзага келган 936 та абонентларнинг жами 234 824 018 сўмлик қарздорликларини асоссиз равишда сохта кечув далолатномалари асосида кечиб юборилганлиги оқибатида давлат бюджетига катта миқдорда зарар етказилганлиги аниқланди. Бу ҳақда «Sangzor.uz» хабар бермоқда.
Шунингдек, мажбурий ижро бюроси туман бўлими томонидан жорий йилнинг июль октябрь ойларида табиий газдан фойдаланувчи аҳоли истеъмолчилари хатловдан ўтказилганда, ҳақиқатда 7689 нафар абонентларнинг табиий газдан бўлган жами қарздорлиги 4 520 727 928 сўм ҳамда 129 та улгуржи истеъмолчиларнинг жами қарздорлиги 99 511 543 сўм эканлиги аниқланди.
Бироқ, тумангаз филиали мансабдор шахслари томонидан аҳоли истеъмолчилар томонидан ҳақиқатда истеъмол қилинмаган 2 447 214 000 сўм, улгуржи истеъмолчилар томонидан истеъмол қилинмаган жами 50 221 640 сўм миқдордаги табиий газни асоссиз равишда аҳолига ва улгуржи истеъмолчиларга ҳисоблаган.
Бундан ташқари, ушбу нореал қарздорликларни «Биллинггаз» дастурига киритиб, аҳолининг қарздорлигини 6 571 878 865 сўм, улгуржи истеъмолчиларнинг қарздорлигини 149 733 183 сўм кўрсатиб, расмий ҳужжатларни қалбакилаштириб, фуқароларнинг ҳуқуқлари ва давлат бюджетига жиддий зарар етказилишига сабабчи бўлган.
Ҳолат юзасидан Мажбурий ижро бюроси туман бўлими томонидан Ўзбекистон Республикаси ЖКнинг 205-моддаси (Ҳокимият ёки мансаб ваколатини суиистеъмол қилиш) 2-қисми, 209-моддаси (Мансаб сохтакорлиги) «а» банди билан жиноят иши қўзғатилган.
Изоҳ (0)