Америка президенти Дональд Трамп маъмурияти Boeing ва Airbus компанияларининг Эрон авиакомпанияларига юзлаб самолётларни сотиш бўйича режаларини бузиши мумкин бўлган стратегияни илгари сурмоқда. Бу ҳақда Wall Street Journal’га таяниб, «РИА Новости» хабар берди.
Нашрнинг маълумотларига кўра, АҚШ маъмурияти Эрон авиатармоқлари янги ёки эски фуқаролик самолётлари орқали Сурияга ҳарбийларни ёки қурол-яроғларни жўнатиши мумкинлигидан хавфсирамоқда. Трампга тақдим этилиши мумкин бўлган вариантлар орасида, самолётларни етказиб бериш ва сотишга тўсқинлик қилувчи қатъий чоралар мавжуд.
Нашрнинг хабар беришича, Францияда жойлашган Airbus концерни ўз самолётларини ишлаб чиқаришда керак бўладиган қисмларнинг аксариятини АҚШдан олади, шу сабабли Эронга самолёт етказиб бериш тўхтатилиши мумкин.
Ўтган йили Эроннинг Iran Air авиакомпанияси Американинг Boeing компанияси билан 80 та самолёт етказиб бериш бўйича шартнома имзолаган. Режаларга кўра Iran Air 50 та Boeing 737 ва 30 та Boeing 777 самолётларини яқин 10 йил ичида олиши керак бўлган. Boeing ва Эроннинг Iran Aseman Airlines авиакомпанияси жорий йилнинг июнь ойида Теҳронга 60 та Boeing 737 MAX самолётларини етказиб бериш бўйича ҳам ўзаро шартнома имзолаган эди.
Изоҳ (0)