Гондурасда 26 ноябрда бўлиб ўтган президентлик сайловидан сўнг юзага келган норозилик намойишлари ва тартибсизликлар оқибатида ҳалок бўлганлар сони 16 кишига етди. Бу ҳақда Марказий Америка давлатининг Инсон ҳуқуқлари бўйича миллий комиссияси ҳисоботига таяниб, «РИА Новости» хабар берди.
Аввалроқ ҳалок бўлганлар сони 7 кишини ташкил этгани ҳақида хабар берилганди.
Норозилик намойишлари сайлов натижаларидан қониқмаган мухолифат томонидан бошланган. Сўнгги расмий маълумотларга кўра, мухолифатнинг талаби бўйича овозлар қайта саналганида ҳам амалдаги президент Хуан Карлос Эрнандес 42,98 фоиз, унинг мухолифатчи рақиби Сальвадор Насралла эса — 41,38 фоиз овоз тўплаган.
Universal порталининг аниқлик киритишича, ҳалок бўлганлар орасида полициячилар ҳам бор. Шунингдек, тартибсизликда иштирок этганлиги учун 1,7 мингга яқин одам қўлга олинган.
Изоҳ (0)