Жереми Раннер, Эмма Уотсон ва Скарлетт Йоханссон энг кўп даромад келтирадиган актёрлар деб топилди

Forbes киностудияларга энг кўп даромад келтирадиган Голливуд актёрлари рўйхатини эълон қилди. Бу ҳақда «РИА Новости» хабар бермоқда.

Мазкур рейтингдаги биринчи ўринни фильмдаги иштироки гонораридан 94 маротаба кўп касса йиғимини кафолатлайдиган Жереми Раннер эгаллади. У «Бажариб бўлмас топшириқ» франшизаси ва Капитан Америка ҳақидаги фильмлар туфайли етакчига айлангани айтилмоқда.

Иккинчи ўриндан актриса Эмма Уотсон жой олган. У қатнашган сўнгги уч фильм, жумладан, «Соҳибжамол ва Махлуқ» мюзикли намойиши студияларга актрисага тўланган ҳар бир долларнинг 70 доллар бўлиб қайтишини таъминлаган.

Энг кўп даромад келтирувчи кино юлдузлари учлигини Скарлетт Йоханссон тўлдирган. Унинг «фойда келтириш» кўрсаткичи 1 га 66 нисбатини ташкил этмоқда. Актриса учун «Қасоскорлар: Алтрон эраси» ва «Биринчи қасоскор: Қарама-қаршилик» фильмлари айниқса муваффақиятли чиққан.

Forbes ушбу рейтингни тузишда 2017 йилнинг 1 июнига қадар намойишга қўйилган картиналарни инобатга олган.