Шавкат Мирзиёев Қорақалпоғистоннинг Хўжайли туманидаги барпо этилаётган замонавий логистика марказида бўлди. Бу ҳақда ЎзА хабар бермоқда.
Президент жорий йил январь ойида Қорақалпоғистонга ташрифи давомида мазкур худудда логистика маркази қуриш топшириғини берганди.
«Хўжайли агросаноат маркази» МЧЖ томонидан ташкил этилаётган мазкур марказ қишлоқ хўжалиги маҳсулотларини сақлаш, қайта ишлаш ва экспорт қилиш билан шуғулланади, ички бозорни қишлоқ хўжалиги маҳсулотлари билан узлуксиз таъминлаш, ер майдонларидан унумли фойдаланиш, янги иш ўринлари яратиш, мамлакатимиз экспорт салоҳиятини оширишга хизмат қилади.
15,3 гектар майдонни эгаллаган мажмуада 2018 йил 5 минг тонна мева-сабзавотни қадоқлаш, саралаш ва қайта ишлаш имконияти яратилади. 150 киши иш билан таъминланади. Президентга мазкур мажмуа ҳақида батафсил маълумот берилди.
Шу ерда Қорақалпоғистонда озиқ-овқат саноати соҳасида амалга ошириладиган инвестиция лойиҳалари, чорвачилик, паррандачилик, асаларичилик ва балиқчиликни ривожлантириш бўйича дастурлар тақдимоти бўлиб ўтди
Президентга 2018 йил Қорақалпоғистонда томорқалардан самарали фойдаланиш дастури лойиҳаси ҳам тақдим этилди.
Давлат раҳбари мазкур лойиҳалар аҳамиятига тўхталиб, уларни янада такомиллаштириш ва ўз вақтида амалга ошириш бўйича топшириқлар берди.
Изоҳ (0)