Самарқандда «Ҳудудларни ижтимоий-иқтисодий ривожлантириш, маҳаллий бюджетларнинг даромад қисмини ошириш ва субвенциядан чиқаришнинг долзарб масалалари» мавзусида давра суҳбати ўтказилди. Бу ҳақда ЎзА хабар бермоқда.
Ушбу йўналишда ЎзЛиДеП томонидан Банк-молия академияси ва Ўзбекистон иқтисодчилар жамияти билан ҳамкорликда тизимли ишлар олиб борилмоқда. Жумладан, Самарқанд вилояти туманларини субвенциядан чиқариш жараёнини партия томонидан ташкил этилган ишчи гуруҳ ўрганиб, ижро ҳокимияти органларига зарур тавсиялар берди.
Давра суҳбатида Самарқанд вилоятининг субвенцияда бўлган туманлари табиий, иқтисодий имкониятлари ва инсон салоҳиятидан, қурилиши тугалланмаган объектлар ва ер майдонларидан оқилона фойдаланиш, ҳудудларнинг экспорт имкониятларини кенгайтириш, мева-сабзавотчилик, чорвачилик, паррандачилик, балиқчилик, асаларичилик ва бошқа фаолият турларини ривожлантириш, тадбиркорлик ташаббусларини ҳар томонлама қўллаб-қувватлаш орқали ҳолатни ўнглаш истиқболлари таҳлил этилди.
2018 йилда Нуробод, 2019 йилда Қўшработ ва Тайлоқ, 2020 йилда Булунғур, 2021 йилда Нарпай туманларини субвенциядан чиқариш билан боғлиқ дастурлар атрофлича муҳокама қилиниб, кўзланган натижага эришиш имконини берувчи омиллар санаб ўтилди.
Изоҳ (0)