Шавкат Мирзиёев Қорақалпоғистоннинг Чимбой туманидаги мактабгача таълим муассасасига ташриф буюрди

Шавкат Мирзиёев Қорақалпоғистон Республикасига ташрифини Чимбой туманидаги 8-сонли мактабгача таълим муассасасидан бошлади, деб хабар берди ЎзА.

Ўзбекистон Президентининг 2016 йил 29 декабрдаги «2017—2021 йилларда мактабгача таълим тизимини янада такомиллаштириш чора-тадбирлари тўғрисида»ги қарори қабул қилиниб, мактабгача таълим муассасаларининг моддий-техника базасини мустаҳкамлаш, жумладан, қишлоқ аҳоли пунктларида янги ана шундай иншоотлар қуриш, уларни замонавий инвентар, ускуналар, ўқув-методик қўлланмалар, мультимедиа ресурслари билан таъминлаш чоралари кўрилмоқда.

Шу билан бирга, Шавкат Мирзиёевнинг 30 сентябрдаги мактабгача таълим тизимини бошқаришни тубдан такомиллаштириш тўғрисидаги фармони билан эса Мактабгача таълим вазирлиги ташкил этилди.

Мазкур боғча 140 ўринга мўлжалланган бўлиб, 1992 йилда ташкил этилган. 37 нафар педагог ва тарбиячи уларга ғамхўрлик кўрсатиб келмоқда.

Шавкат Мирзиёев боғчада болаларга яратилган шароитлар билан танишди, тарбияланувчиларни яқинлашиб келаётган Янги йил байрами билан табриклади.

«Мактабгача таълим тизимига алоҳида эътибор қаратаётганимиз бежиз эмас. Ёшлар тарбиясига бугундан эътибор бермасак эртага кеч бўлиши мумкин. Мактабгача таълим муассасаларини Қорақалпоғистоннинг иқлим шароитидан келиб чиқиб қуриш керак. Ҳар бир хонани иситиладиган пол билан таъминлаш зарур. Бундан ташқари бу соҳа учун кадрлар тайёрлаш тизимини ҳам қайта кўриб чиқиш керак. Бунинг учун олий таълим муассасалари қошида махсус курслар ташкил қилиш лозим. Тарбиячилар савияси болалар келажаги учун муҳим аҳамиятга эга», — деди Шавкат Мирзиёев.

Ўзбекистон Президенти болаларнинг овқатланиш рациони билан қизиқди.

Шунингдек, янги қурилаётган боғчалар лойиҳасини тайёрлашда Жанубий Корея тажрибасини татбиқ қилиш лозимлиги қайд этилди.

«Бундай иншоотларни эскича руҳдаги лойиҳалар асосида қуриш ўзини оқламаяпти. Болаларнинг ётоқхоналари ва дарсхоналарини кенг ва ёруғ қилиб бунёд қилишимиз, маъмурий хоналарни ихчамлаштиришимиз керак», — деди Ўзбекистон Президенти.

Ўзбекистон Президенти педагогика коллежини тугатган ёшларни қайта тайёрлов курсларига жалб қилиб, уларни мактабгача таълим муассасаларига ишга қабул қилиш бўйича топшириқ берди.