Осиё бокс конфедерацияси йил якунларига бағишланган The Best of the Asians—2017 тақдирлаш маросимини ўтказди. Бу ҳақда ташкилот матбуот хизмати хабар берди.
Унга кўра, Ўзбекистон бокс федерацияси қитъада йилнинг энг яхши ташкилоти сифатида тан олинди. Овоз беришда мамлакат бокси учун жавобгар ташкилот қолган рақобатчиларидан илгарилаб кетди.
Ўзбекистон бокси Осиё ва жаҳонда ўз ўрнига эга экани билан ажралиб туради ва унинг спортчилари 2017 йил катта ютуқларга эришди. Шу йил Ўзбекистон Осиё Чемпионатига мезбонлик қилди ва маҳаллий спортчилар унда 9 та олтин медални қўлга киритди. Мамлакат боксчилари бу билан чекланиб қолмади. Улар Таиландда ўтган ёшлар ўртасидаги Осиё Чемпионатида ҳам умумжамоа ҳисобида биринчи бўлди. Катталар ўртасидаги Жаҳон Чемпионатида эса Ўзбекистон термаси жами 6 та медални қўлга киритишга муваффақ бўлди, деб изоҳ берди ОБК сайти.
Овоз берувчиларнинг 91 фоизи Ўзбекистон бокс федерациясини 1-ўринга жойлаштирган. Таиланд ҳамда Филиппин эса бу борада бор-йўғи 3,6 фоиз овозга эга чиқди.
ОБК, шунингдек, Афғонистон бокс федерациясига тезлик билан ривожланаётгани учун рағбатлантирувчи соврин топширди. Бу совринни афғонистонликларга Осиё бокс конфедерацияси президенти ҳамда AIBA вице-президенти Серик Конакбоевнинг ўзи берди.
Ўзбекистон The Best of the Asians—2017 маросимида яна бир номинацияда ғолибликни қўлга киритди. -69 килограмм вазн тоифасида мамлакат шарафини халқаро майдонда муносиб ҳимоя қила олган Шаҳрам Ғиёсов йилнинг энг яхши эркак боксчиси сифатида тан олинди. Қайд этиш керак, Ғиёсов аввал Тошкентдаги Осиё Чемпионатида, кейинроқ Гамбургдаги Жаҳон Чемпионатида олтин медални қўлга киритганди.
Олимпиада совриндори Шаҳрам Ғиёсов фаолиятини профессионал боксда давом эттиришга қарор қилди (видео)
Шаҳрамни овоз берувчиларнинг 57,2 фоизи 1-ўринга лойиқ кўрган. Қизиғи, 2-ўриндан ҳам ўзбекистонлик спортчи жой олди. -49 килограмм вазн тоифасида Осиё чемпионлиги ва жаҳон вице-чемпионлигини қўлга киритган Ҳасанбой Дўстматов 32,8 фоиз овоз тўплаган. Қозоғистонлик Қайрат Ералиевда эса бу кўрсаткич 6,1 фоизга тенг.
Йил мураббийи сифатида япониялик Ҳирокуни Мото тан олинди. Йилнинг кашфиёт боксчиси учун совринни суриялик Хусаин Ал-Масри қўлга киритди.
Изоҳ (0)