Хитойнинг энг йирик компанияларининг бири Ўзбекистон қишлоқ хўжалиги соҳасига ярим миллиард долларлик инвестиция киритиш бўйича битим имзолади. Бу ҳақда Ўзбекистон қишлоқ ва сув хўжалиги вазирлиги ҳамда «Озиқ-овқат холдинг» вакиллари хабар берди.
5—12 декабрь кунлари Хитойнинг Хэнань провинциясидаги Wаnbang компаниясининг раҳбарияти Ўзбекистоннинг Хитойдаги элчиси Бахтиёр Саидовнинг тавсияси билан Ўзбекистонга ташриф буюрди.
Wаnbang компанияси Женгжоу шаҳрида 40000 квадрат метр майдонда жойлашган, улгуржи савдога мўлжалланган энг йирик озиқ-овқат логистика марказини барпо этган.
Хитой озиқ-овқат бозорининг 37 фоизини эгаллаган ушбу компания вакиллари Тошкент, Самарқанд, Жиззах, Сирдарё вилоятларида бўлиб, Ўзбекистон билан ҳамкорлик ришталарини ривожлантиришга катта қизиқиш билдирди. Ўзбекистон ва ХХР ҳамкорлигининг кординатор вакили «Озиқ-овқат холдинг»нинг Хитой йўналиши бўйича бўлим бошлиғи Дилшод Муллабаевнинг таклифи ва компания раҳбариятининг хайрихоҳлиги билан қишлоқ хўжалиги, жумладан,чорвачилик маҳсулотларини етиштириш, кўпайтириш, қайта ишлаш ва қадоқлаш бўйича ҳамда тайёр маҳсулотларни экспорт, импорт ва қайта экспорт қилиш каби йўналишларда 15 дан ортиқ лойиҳаларни амалга ошириш бўйича келишувга имзо чекилди.
Ушбу лойиҳаларни молиялаштириш учун жами 500 миллион долларлик инвестициялар жалб қилинади. Ушбу келишув Henan Wanbang Selected Supply Chain Management Co.Ltd, Ўзбекистон Республикаси Қишлоқ ва сув хўжалиги вазирлиги ва «Озиқ-овқат холдинг» ўртасида имзоланди.
Имзoланган келишувга асосан, Ўзбекистоннинг эркин иқтисодий зоналарида 10 000 гектарлик ҳудудга логистика марказлари, қишлоқ хўжалик маҳсулотларини қайта ишлаш объектларини барпо этиш режалаштирилган.
Бундан ташқари, Ўзбекистонда етиштирилган 100 000 тонна мошнинг Хитойга экспорт қилиниши кўзда тутилган.