ИШИД террорчилари Хитойнинг DJI компанияси томонидан оддий фуқароларга мўлжаллаб ишлаб чиқарилган Х8 учувчисиз бошқариладиган қурилмасидан разведка ва бомбардимон қилишда фойдаланмоқда. Бу ҳақда Financial Times газетасига таяниб, «ТАСС» хабар берди.
Маълумотларга кўра, террорчилар ушбу дронларга икки метр келадиган қанотлар ўрнатган. Бир неча ўн километр масофа учишга қодир қурилмадан аэросураткашлик ишларида фойдаланилмоқда, у умумий ўғирлиги 40 килограммгача етадиган портловчи моддаларни ташишга қодир. 2016 йил октябрь ойида Мосул яқинидаги тўғонда бундай қурилма оқибатида икки курд жангчиси ҳалок бўлган ва яна икки француз махсус кучларининг ходими жароҳатланган эди.
DJI вакилларидан бирининг сўзларига кўра, ҳарбий мақсадга мўлжалланган дронлардан фойдаланиш ва ишлаб чиқиш қатъий равишда тартибга солинган. Фуқаролар учун ишлаб чиқарилган дронларни эса назоратга олиш қийин. «Ишлаб чиқарувчи сифатида биз ундан қай йўсинда фойдаланилаётганини назорат қила олмаймиз», — дея маълум қилди Хитой компанияси.
Ишлаб чиқарувчиларнинг сўзларига кўра, самолётлардан бундай мақсадларда фойдаланиш «ғайринсоний хатти-ҳаракатлар» ва «технологиялардан жиноят йўлида фойдаланиш» ҳисобланади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)