11 декабрь куни Истанбул жиноят ишлари бўйича судида 2016 йилнинг 31 декабрь куни Reina тунги клубида юз берган теракт иши бўйича биринчи суд эшитуви бўлиб ўтади. Бу ҳақда «Казинформ» хабар бермоқда.
Теракт оқибатида 39 киши ҳалок бўлди, 122 киши, хусусан 60 нафар хорижий фуқаро жароҳатланди.
Суд эшитувида 57 киши иштирок этади, улардан 51 нафари, жумладан теракт ижрочиси Абдулқодир Машарипов ҳам судланувчилар қаторидан жой олган.
Тергов жараёни Истанбул бош прокуратураси терроризм ва уюшган жиноятчиликка қарши курашиш бўйича бўлими прокурори Гёкалпа Кекчу назорати остида олиб борилган. Ҳозирда 90 бетли айблов акти тайёрланган.
Прокуратура Абдулқодир Машариповни 40 йилга озодликдан маҳрум этиш ва жазони қатъий тартибда ўташга ҳукм қилишни талаб қилмоқда.Тергов жараёнида Машарипов ИШИД террорчилик ташкилоти фаолиятига алоқадор эканлигини ва Reina’даги ҳужумдан аввал яна бир неча терактда иштирок этганини тан олди.
Террорчининг таъкидлашича, клубга ҳужум қилишдан мақсад христианлардан ўч олиш бўлган.
«Мен христианларга ҳужум қилиб, уларнинг бутун дунё бўйича олиб борилаётган кирдикорлари учун ўч олмоқчи эдим. Суриялик Абу Жиҳод ўзаро ёзишмада менга Истанбулнинг Таксим майдонида ҳужум уюштиришни буюрди. Бироқ, бу туманда полиция кўп бўлиши инобатга олиниб, Ўртакўй туманида христианларга ҳужум уюштириш топширилди», — дейди у.
Машарипов Туркиянинг Ван шаҳрига 2016 йилнинг январида келганини, кейинроқ эса Истанбулга кўчиб ўтганини сўзлаб берди.
«Мен Сурияга йўл олиш учун Истанбулда кутдим. У ерга рафиқам ва болаларим билан кетишни режалаштиргандим, бироқ чегара ёпиқ эди. Тунги клубга ҳужум ҳақида гапирадиган бўлсам, мен у ерга ўлиш учун боргандим. Ҳужумдан сўнг клубдан жабрланувчи сифатида чиқиб, таксига ўтирдим ва уйимга яшириндим», — дейди террорчи терговга.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)