Мисрнинг Копт православ черкови яқин вақт ичида Қоҳирага ташриф буюриши кутилаётган АҚШ вице-президенти Майкл Пенсни қабул қилишдан бош тортди. «РИА Новости» хабарига кўра, бунга Вашингтоннинг Қуддус масаласидаги нуқтаи назари сабаб бўлган.
Коптлар черковининг расмий вакили берган баёнотга кўра, Майкл Пенсни қабул қилмаслик ҳақидаги қарор «араб мамлакатларидаги миллионлаб аҳолининг ҳис-туйғуларини ҳисобга олмаётган АҚШ маъмуриятининг Қуддус бўйича нуқтаи назарига жавобдир».
Аввалроқ, 8 декабрь, жума куни Исломнинг сунний мазҳабидаги энг йирик ҳисобланган Мисрнинг Ал-Азҳар университети раҳбари Аҳмад ат-Тойиб ҳам Вашингтоннинг Қуддус бўйича қарори сабаб Майкл Пенс билан учрашишдан бош тортишини маълум қилган эди.
Ал-Азҳар вакилларининг қайд этишича, улар «тарихни сохталаштирувчилар, халқларнинг ҳуқуқларини поймол қилувчилар ва бу халқларнинг муқаддас зиёратгоҳларига ҳужум қилувчилар билан мулоқот қилмайди».
Эслатиб ўтамиз, 6 декабрь, чоршанба куни АҚШ президенти Дональд Трамп Қуддусни Исроил пойтахти сифатида олган ва Давлат департаментига АҚШ элчихонасини Тел-Авивдан Қуддусга кўчириш ҳақида кўрсатма берган эди.
Изоҳ (0)