Ўзбекистон Республикаси Президенти Шавкат Мирзиёев Ўзбекистон Республикаси Конституцияси қабул қилинганининг 25 йиллигига бағишланган тантанали маросимдаги маърузасида жиноятчиликнинг олдини олиш мақсадида Ўзбекистонда янги дастур ва режалар амалга оширилаётганини таъкидлади, дея хабар бермоқда ЎзА.
Президентнинг қайд этишича, соҳага ахборот-коммуникация технологиялари кенг жорий этилмоқда. Хусусан, маҳаллалар, кўчалар, савдо ва хизмат кўрсатиш объектларида 114 мингдан ортиқ видеокузатув воситаси ўрнатилган бўлиб, уларнинг ёрдамида 10 мингга яқин жиноят фош этилган.
«Қийноққа солиш каби ноқонуний усулларни қўллашни қатъиян чеклаш мақсадида тергов ва вақтинча сақлаш ҳибсхоналари ҳам видеокузатув воситалари билан жиҳозланади», — деди Президент.
Бундан ташқари, суд-тергов жараёнида далилларни сохталаштирганлик учун алоҳида жиноий жавобгарлик жорий қилиниши кўзда тутилмоқда. Адвокатлар эса жиноят иши бўйича далилларни тўплаш ва тақдим этиш ҳуқуқига эга бўлади. Бу далиллар тергов ва суд идоралари томонидан мажбурий текширилиши ва баҳоланиши керак.
Шавкат Мирзиёевнинг таъкидлашича, 2017 йил маҳалла фуқаролари йиғинлари кафиллиги асосида 152 нафар, Ёшлар иттифоқи кафиллиги асосида 18 нафар, хотин-қизлар қўмиталари кафиллиги асосида 3 нафар, жами 173 нафар фуқарога нисбатан жазо тайинлашда жамоатчилик кафиллиги эътиборга олинган. Бу фуқароларнинг 38 нафарини ёшлар, 18 нафарини вояга етмаганлар, 11 нафарини аёллар ташкил этган.
«Ана шундай ишлар натижасида мамлакатимиз бўйича 63 нафар шахс суд залидан қамоқдан озод қилинди, 11 нафар шахс жавобгарликдан озод қилинди, 97 нафар шахсга нисбатан енгилроқ жазо тури қўлланди», — деди Президент.
Бундан ташқари, 2017 йилнинг 10 ойи давомида судлар томонидан 191 нафар шахсга нисбатан оқлов ҳукмлари чиқарилган. Ҳолбуки, Президентнинг алоҳида таъкидлашича, илгари битта оқлов ҳукми чиқариш ҳам судлар фаолиятида ўта кам учрайдиган ҳодиса эди.
Терговнинг сифати яхшиланиб, терговчилар масъулияти оширилди. Хусусан, шу давр мобайнида тергов органлари томонидан 238 та ҳолатда жиноий ҳодиса юз бермагани аниқланди. 302 та ҳолатда жавобгарликка тортиш муддати ўтгани, 370 та ҳолатда айбдорлар қилмишига чин кўнгилдан пушаймон бўлгани инобатга олинди. 549 та ҳолатда қилмиш ижтимоий хавфлилик хусусиятини йўқотгани, 1 636 та ҳолатда қилмишда жиноят таркиби йўқлиги исботланди. Ана шундай асосларга таяниб, 3,5 мингдан ортиқ жиноят иши тугатилди.Шавкат Мирзиёев, Ўзбекистон Президенти
Изоҳ (0)