Олий ва ўрта махсус таълим вазирлигида «Олий таълим муассасаларида коррупция, ҳуқуқбузарликлар профилактикаси ва жиноятчиликка қарши курашиш борасида маънавий-маърифий ишлар самарадорлигини оширишнинг долзарб масалалари» мавзуида видеоселектор йиғилиши бўлиб ўтди. Бу ҳақда ЎзА хабар бермоқда.
Олий ва ўрта махсус, касб-ҳунар таълими тизимида таҳсил олаётган ёшлар ўртасида ҳуқуқбузарликлар профилактикасини кучайтириш юзасидан вазирликда кенг қамровли ишлар амалга оширилмоқда. Коррупцияга қарши курашиш бўйича ишлаб чиқилган дастур бўйича турли тадбирлар, давра суҳбатлари, танловлар, семинар-тренинглар мунтазам ўтказилмоқда. Мамлакатда ҳафтанинг ҳар пайшанба куни жиноятчилик ва ҳуқуқбузарликнинг олдини олиш бўйича профилактика куни, деб эълон қилингани ёшларнинг билиб-билмай ножўя хатти-ҳаракатлар содир этиши, йўлдан адашишини ўз вақтида бартараф этишда муҳим омил бўлмоқда.
Видеоселектор йиғилишида олий ва ўрта махсус таълим масканларидаги ҳуқуқбузарлик ҳолатлари холис, чуқур ва атрофлича таҳлил этилди. Ўқувчи-ёшларда тинч ва осуда ҳаётнинг қадрига етиш, шукроналик, ҳалоллик туйғуларини мустаҳкам қарор топтириш педагогик жамоа, маҳалла, оилалар зиммасига улкан вазифалар юклаши таъкидланди.
Маънавий-маърифий тадбирларнинг сифати ва таъсирчанлигини ошириш, ёшларнинг таълимдан ташқари бўш вақтини тўғри ва оқилона ташкил этишда турли фан, бадиий ижодиёт, касб-ҳунарга оид тўгараклар ишини кучайтириш, талабалар турар жойларида маънавий-маърифий чора-тадбирларни такомиллаштириш, ўқув масканларининг ҳуқуқ-тартибот идоралари билан ҳамкорлигини мустаҳкамлаш бўйича аниқ вазифалар белгиланди.
Изоҳ (0)