Бугун Ўзбекистон Кубогининг финалида «Бунёдкор» ва «Локомотив» ўзаро майдонга тушади

Футбол бўйича Ўзбекистон Кубоги—2017 ғолиби бугун — 4 декабрь куни бўлиб ўтадиган финал учрашувидан сўнг маълум бўлади.

Финалгача Тошкентнинг «Бунёдкор» ва «Локомотив» клублари етиб келган. Улар иштирокидаги ўйинга «Бунёдкор» стадиони мезбонлик қилади. Учрашувни БААдан ташриф буюрган ҳакамлар бригадаси бошқариб боради. Кубокни эса ғолиб жамоага Тошкентда бўлиб турган ОФК президенти Шайх Салмон топширади.

Осиё Футбол Конфедерацияси президенти Шайх Салмон бин Иброҳим Ал-Ҳалифа Тошкентга келди

2006 йил «Локомотив» кубокнинг 2-саралаш босқичида «Қурувчи»ни таслим қилган — 3:1. 2013 йилда эса «Бунёдкор» ярим финалда «Локо»дан устун келган — 2:2 ва 2:0. Ўша вақтда «Бунёдкор»ни худди ҳозиргидек Миржалол Қосимов мураббий сифатида бошқарарди.

2014 йил мазкур икки клуб Ўзбекистон Кубогининг финалида ўйнаган. Ўшанда Сергей Лушчан бошқарувидаги «Бунёдкор» 0:1 ҳисобида имкониятни бой берган ва «Локомотив» ўз тарихида илк бор мамлакат кубогини қўлга киритган.

2016 йил ҳам Сергей Лушчан бошқарган жамоа «Локо»га қаршилик қила олмаган. Ярим финалдаги ҳар икки ўйинда ҳам «темирйўлчилар» 1:0 ҳисобида устун келган ва якунда кубокка эга чиққан.

«Бунёдкор» шу вақтга қадар Ўзбекистон Кубогида 4 бор зафар қучган — 2008, 2010, 2012 ва 2013. Буларнинг барчасида жамоада Миржалол Қосимов ишлаган. «Темирйўлчилар»да эса кубоклар сони 2 та — 2014 ва 2016.

«Локомотив» бунга қадар Ўзбекистон чемпионатининг 2017 йилги мавсумида ғолибликни қўлга киритиб, Осиё Чемпионлар Лигаси гуруҳ босқичи учун берилган 1 дона квотани ютиб олган. Қаршининг «Насаф» клуби эса 2-ўрин эгаси сифатида ОЧЛ саралашида ўйнаш имконини қўлга киритганди. Бугунги финал саралашда ўйнайдиган иккинчи жамоа номига аниқлик киритиб беради. «Бунёдкор» зафар қучса, келаси мавсум халқаро майдонда ўйнайди. Мағлуб бўлса, Олий Лигани 3-ўринда якунлаган «Пахтакор» ўша чипта эгасига айланади.

Ўзбекистон Кубогининг финал ўйини иш соати ҳисобланган душанбанинг 15:00 да старт олади.