Таиланд пойтахти Бангкок Осиё Футбол Конфедерациясининг йиллик тақдирлаш маросимига мезбонлик қилди. Унда Осиё футболининг 2017 йилдаги энг яхшилари тақдирланди.
Йил футболчиси бўлиш учур курашда суриялик Умар Харбинга омад кулиб боқди. Сурия миллий термасининг иродали жамоага айланишида бош роллардан бирини ўйнаган ва «Ал-Ҳилол» клубининг ОЧЛ финалига йўл олишига катта ҳисса қўшган Умар Харбин рақобатчиларини ортда қолдирди.
Бу борада Харбинга Осиёнинг 2016 йилдаги энг яхши футболчиси Умар Абдулраҳмон ва Хитой термаси етакчиларидан бири, шунингдек, Одил Аҳмедов билан «Шанхай СИПГ» шарафини ҳимоя қиладиган Ву Лей рақиб бўлганди. Якунда бир неча йиллардан буён тинчлик ҳукм сурмаётган Сурия футболчиси ғолиб чиқди.
ОФК йилнинг энг яхши легионер футболчиси совринини кореялик Сон Хён Минга топширди. Лондоннинг «Тоттенҳэм» клуби сафида ёрқин ўйинлар кўрсатаётган футболчи Европада тўп тепаётган қолган осиёликлардан илгарилаб кетди.
Тақдирлаш маросимида ўзбекистонлик вакил ҳам совриндорлар қаторидан жой олди. Соҳил футболида фаолият олиб борадиган Бахтиёр Намозов ОФКнинг ҳакамлар учун ажратган махсус совғаси билан тақдирланди.
Энг яхши мурабби
Такафуми Хори — «Урава Ред» (Япония)
Энг яхши аёл мураббий
Асако Такакура — Япония
Энг яхши аёл футболчи
Саманта Керр — Австралия
Энг яхши ёш футболчи
Ли Сёнг Ву — Жанубий Корея
Энг яхши ёш аёл футболчи
Сунг Хянг Сим — КХДР
Энг яхши футзалчи
Али Асқар Ҳасанзода — Эрон (кетма-кет иккинчи бор)
ОФК оммавий футбол ривожига қўшаётган ҳиссаси учун Хитой Футбол Ассоциациясини тақдирланди. Кейинроқ йилнинг энг яхши футбол федерацияси совринини Эронга топширди. «Осиё орзуси» соврини эса Японияга насиб қилди. «Осиё олмоси» билан БАА Футбол Ассоциацияси президенти Юсуф Ас-Серкал тақдирланди.
Тақдирлаш маросимида ФИФА президенти Жанни Инфантино ҳам иштирок этганди. У ва ОФК президенти якунда ЖЧ—2018 чиптасини қўлга киритган Осиёнинг беш мамлакати — Эрон, Япония, Саудия Арабистони, Жанубий Корея ва Австралияга махсус совға топширди. Бунгача мундиалларда Осиё қитъасидан 5 та терманинг иштирок этиши кузатилмаганди.
ЎФФ президенти Умид Аҳмаджонов маросимда иштирок этди ва тақдирланганларни кузатди.
Изоҳ (0)