Ўзбекистонда Инновацион ривожланиш вазирлиги ва Мудофаа саноати бўйича давлат қўмитаси ташкил этилади

Ўзбекистон ҳукумати таркибида янги тузилмалар ташкил этилади. Бу ҳақда, ҳукуматдаги манбаларига асосланиб, «Газета.uz» хабар бермоқда.

Хабар беришларича, Ўзбекистон Инновацион ривожланиш вазирлиги ҳамда Инновацион ривожланиш ва новаторлик ғоялари фонди тузилади. Бу икки тузилма фаолияти бош вазир ўринбосари — Инвестициялар, инновацион ривожланиш, эркин иқтисодий ва кичик саноат зоналари фаолиятини мувофиқлаштириш, туризм масалалари комплекси раҳбари томонидан тартибга солинади.

Бундан ташқари, Ўзбекистон Мудофаа саноати бўйича давлат қўмитаси ташкил этилади. Ушбу ташкилот фаолияти бош вазир ўринбосари — Ташқи савдо фаолияти, экспорт салоҳияти, машинасозлик, автомобилсозлик, электротехника, мудофаа, пахтани қайта ишлаш ва енгил саноатни ривожлантириш, маҳсулотларни стандартлаштириш масалалари комплекси раҳбари томонидан тартибга солинади.

Мазкур янги идора ва ташкилотлар айнан қачон ташкил этилиши ҳақида аниқ маълумотлар ҳозирча йўқ.