Amerikaning Gavayi shtatida sovuq urush davridan buyon birinchi marotaba yadroviy hujumdan ogohlantirish tizimi sinovdan o‘tkaziladi. Bu haqda NBC’ga tayanib, “Korrespondent.net” xabar berdi.
Mahalliy hukumatning bu kabi qarorga kelishiga Vashington va Pxenyan o‘rtasidagi vaziyat sabab bo‘ldi. Gavayi favqulodda vaziyatlar agentligi rahbari Vern Miyagining so‘zlariga ko‘ra, KXDR tomonidan yadroviy zarba berilish ehtimolligi kam, biroq agarda vaziyat shunga yetib borsa, orol “shimollik”larning birinchi nishoniga aylanadi.
“Biz Shimoliy Koreyaga AQShning boshqa hududlariga nisbatan yaqinroqmiz. Xavfni sezmaslik qiyin: biz uchirilayotgan raketalar va yadroviy sinovlar borasidagi yangiliklarni kuzatib boryapmiz”, — dedi Miyagi.
Ogohlantirish tizimi 1-dekabrdan sinovdan o‘tkazila boshlanadi. Sirena har oyda yangrashi kutilmoqda. Shuningdek, signaldan sunami va to‘fonlar yaqinlashuvida ogohlantirish borasida ham foydalanish rejalashtirilgan.
Gavayi hukumati mahalliy aholiga yadroviy hujum vaqtida “iloji boricha betonli” boshpana topishni, u yerda kamida 48 soatga yetadigan ichimlik suvi va oziq-ovqat saqlashni tavsiya etilmoqda.
Amerikalik ekspertlarning ta’kidlashicha, KXDR raketalari 20 daqiqada Gavayi orollariga qadar yetib kela oladi. Harbiylarga raketalar harakatining trayektoriyasini aniqlash uchun besh daqiqa kerak bo‘ladi, shundan keyin aholini xavfdan ogohlantirishga 15 daqiqa vaqt qoladi.
Izoh (0)