Алишер Навоий номли кино саройида актёр ва режиссёр Суҳроб Ҳасановнинг «Севгимиз учун» деб номланган фильмининг премьераси бўлиб ўтди. Ушбу фильм, бош роль ижрочиси Василика Сидорова, нега айнан илк бор фильмда суратга тушаётган актрисани бош ролга танлагани ҳақида актёр Суҳроб Ҳасанов журналист Феруз Муҳаммадга батафсил маълумот берди.
«Севгимиз учун» фильмининг суратга олиш ишлари май ойида бўлиб ўтган эди. Тайёргарлик ишлари яхши бўлгани боис бир ой ичида суратга олиш ишлари якунланди. Фильмда илк бор Рус академик ва драма театри актрисаси Василика Сидорова бош ролни ижро қилди. «Севгимиз учун» фильмидаги бош роль учун 50-60 га яқин қизлар орасидан Василика Сидоровани кастинг асосида танлаб олганмиз. Бу ролга рус қизи керак бўлгани учун театр актрисаси Гулнора Жуманазаровани сочини сариққа бўяб ўйнатишни ҳам ўйлаган эдик, аммо кино синовларга унинг вақти бўлмагани учун ҳамда барчаси табиий бўлгани маъқул дея Василика Сидорова номзодида тўхтаганмиз. Табиийликни сақлаб қолиш учун ҳаттоки дубляжда ҳам Василика Сидорованинг ўзи овоз берди. Василика Сидорова умуман ўзбек тилини билмагани боис суратга олиш ишларида бироз қийинчиликлар бўлди, чунки мен ҳам рус тилини у даражада билмас эдим. Охир-оқибат Василика Сидорова ўзбек тилини бирмунча ўрганиб олди, ҳаттоки Қуръони Каримдан оятлар ҳам ёдлади. Фильмда Ўзбекистонда хизмат кўрсатган артистлар Ботир Муҳаммаджонов, Саида Раметова, актёрлар Умид Шодмонов, Отабек Ҳақбердиев, актриса Зилола Ғуломова сингари санъаткорлар бош ролларни ижро этди. Фильм қаҳрамонлари ўз севгилари учун катта қурбонликлар қилишга мажбур бўлади. Шу сабабдан биз ҳам томошабинга булар шунчалик қурбонлик қилаётганида, «Сен севгинг учун нима қилдинг?», дея савол билан мурожаат қилганмиз.Эслатиб ўтамиз, «Севгимиз учун» фильмини 23 ноябрдан Ўзбекистоннинг барча кинотеатрларида томоша қилишингиз мумкин.Суҳроб Ҳасанов, актёр ва режиссёр
Изоҳ (0)