АҚШ давлат котиби Рекс Тиллерсон Ҳиндистонда бўлажак тадбиркорлик саммитида (Global Entrepreneurship Summit) мамлакат делегациясини президент Трампнинг қизи ва ёрдамчиси Иванка бошқариши сабабли у ерга етакчи дипломатларни юбормаслиги мумкин. Бу ҳақда «ТАСС» хабар бермоқда.
CNN телеканалининг Давлат департаментидаги манбаларига кўра, Тиллерсон президентнинг қизини қўллаб-қувватлашни истамагани учун шундай қарор қабул қилди. Олдинги йиллари мазкур саммитга собиқ АҚШ президенти Барак Обама, собиқ давлат котиби Жон Керри ташриф буюрганди.
«Давлат котиби ёрдамчисининг ўринбосаридан юқори лавозимдагиларга тадбирда иштирок этишга рухсат берилмади. Раҳбарият ташрифнинг барча икир-чикирларигача келишилиши талаб қилмоқда. Тиллерсон ва унинг атрофидагилар Иванкани қўллаб-қувватлашни истамагани учун юқори мартабали шахслардан ҳеч кимни юбормайди», — деди манбалардан бири.
Изоҳ (0)