Бухорода тўй маросимида келин-куёвнинг 1 500 000 сўм миқдоридаги тўёнасини ўғирлаб кетган коллеж талабаси ушланди. Бу ҳақда Бухоро вилояти ички ишлар бошқармаси расмий сайтида хабар берилди.
Ғиждувон туман ИИБга, Қорахоний МФЙ, Қўрғон қишлоғида яшовчи, 1994 йилда туғилган Сардорбек Нарзуллоев ариза орқали мурожаат қилиб, 2017 йил 18 ноябрь куни соат 18:00 дан 23:00 ларга қадар бўлган вақт оралиғида номаълум шахс акаси Нарзуллоев Санжарнинг никоҳ тўйи бўлиб ўтаётган Сарвари МФЙда жойлашган «Ситора» номли тўйхонадаги келин-куёв столи устидан 1 500 000 сўм миқдоридаги пулларни ўғирлаб кетганлигини билдирган.
Олиб борилган тезкор тадбирлар натижасида, ушбу ўғрилик жиноятини 1999 йилда туғилган, Аббосхўжа МФЙ, Аббосхўжа қишлоғида яшовчи, ҳозирги вақтда Ғиждувон тумани Қурилиш ва касб-ҳунар коллежида таҳсил олаётган, вояга етмаган Шамсиев Жавоҳир Ражаб ўғли содир этганлиги аниқланди.
Ушбу ҳолат юзасидан Жавоҳир Шамсиевга нисбатан Ўзбекистон Республикаси Жиноят Кодексининг 169-моддаси 1-қисми (ўғрилик) билан жиноят иши қўзғатилди.
Изоҳ (0)