Месси «Барселона» билан шартномасини 2021 йил ёзигача узайтирди. Энди унинг нархи 700 млн евро!

«Барселона»нинг аргентиналик ҳужумчиси Лионель Месси клуб билан янги шартнома имзолади. Бу ҳақда Каталония клуби расмий сайти хабар бермоқда.

Футболчининг «Барселона» билан янги келишуви 2020/2021 йилги мавсум охирига қадар амал қилади. Шартномада Мессини сотиб олиш истагидаги клуб «Барселона»га 700 миллион евро миқдорида товон пули тўлаши лозимлиги ёзиб қўйилган.

Мессининг аввалги шартномаси 2018 йил ёзида якунига етарди; эски шартнома бўйича футболчи учун харидор клуб томонидан тўланиши керак бўлган товон пули миқдори 250 миллион еврога тенг эди.

30 ёшли ҳужумчи 2004 йилдан бери жамоа асосий таркибида мунтазам равишда майдонга тушади. 2004/2005 йилги мавсумдан 2016/2017 йилги мавсумга қадар у Испания чемпионатида 382 учрашувда майдонга тушиб, 349 та гол урган. Аргентина терма жамоасида эса 123 ўйин ўтказиб, 61 та гол урган.

У «Барселона»даги фаолияти давомида 8 марта Испания чемпиони бўлган, 5 марта Испания Кубоги, 7 марта Испания Суперкубогини қўлга киритган. 4 марта Европа Чемпионлар Лигасида, 3 марта Клублар ўртасидаги жаҳон чемпионатида ғолиб чиққан. Аргентина терма жамоаси билан Пекин—2008 Олимпиадасида чемпион, ЖЧ—2014 да эса вице-чемпион бўлган.

Месси жорий мавсум Ла Лигада 12 учрашувда майдонга тушиб, 12 та гол урди, тўртта голга ҳаммуаллифлик қилди.