Европа Лигаси гуруҳ босқичининг 5-турида Англия Премьер-Лигасининг мусобақада иштирок этаётган ҳар икки клуби мағлуб бўлди.
Роналд Куманни истеъфога чиқарганидан буён ўзига янги бош мураббий топа олмаётган ва Дэвид Ансвортни вақтинча ушлаб турган «Эвертон» ўз майдонида шармандали мағлубият қабул қилиб олди. Италиянинг «Аталанта» клубига қарши сафар ўйинида «Эвертон» 0:3 ҳисобида имкониятни бой берганди. Ўз майдонида эса бирйўла 1:5 ҳисобида енгилди.
«Эвертон» — «Аталанта» 1:5
Голлар: Бриан Кристанте, 12 (0:1). Бриан Кристанте, 63 (0:2). Сандро Рамирес, 71 (1:2). Робин Гозенс, 86 (1:3). Андреас Корнелиус, 88 (1:4). Андреас Корнелиус, 94+ (1:5).Ноаниқ пенальти: Алехандро Гомес, 48 (А).
Гуруҳда «Лион» ва «Аталанта» 11 тадан очко жамғариб, келаси босқич масаласини ҳал қилиб бўлган. Улар сўнгги турда зона пешқадамлигини аниқлаштириб олиш пайида бўлади.
Лондоннинг «Арсенал» клуби 4-турдан кейиноқ ўз гуруҳида пешқадам бўлиб улгурганди. Шу боисдан Арсен Венгер жамоаси 5-турга жиддий эътибор қаратмади ва мавсумни Бундеслигада жуда ёмон бошлаган «Кёльн»га имкониятни бой берди.
«Кёльн» — «Арсенал» 1:0
Гол: Серу Гирасси, 62-пен (1:0).
Шу тариқа Европа Лигасида зафар қучиш учун Англиянинг фақатгина 1 та — «Арсенал» клуби курашда қолади. «Эвертон» эса турнирни паст кўрсаткич билан якунлаб бўлди. Қайд этиш керак, Европа Чемпионлар Лигаси гуруҳ босқичининг 5-туридан кейин АПЛнинг ҳар беш клуби ўз зонасида пешқадам бўлиб турибди.
Изоҳ (0)