Россия, Туркия ва Эрон қуролли кучлари Сурияда қолган жангариларни йўқ қилиш бўйича қўшма чоралар ишлаб чиқди. Бу ҳақда Россия мудофаа вазирлиги расмий баёнот берди, деб хабар қилади «РБК».
Чоралар уч мамлакат қуролли кучлари бош штаблари бошлиқларининг Сочи шаҳрида бўлиб ўтган учрашуви чоғида келишиб олинди.
Хусусан, Идлибдаги деэскалация зоналарида координация даражасини ошириш, ИШИД ва «Жабҳат ан-Нусра» гуруҳлари қолдиқларини йўқ қилиш бўйича келишувга эришилди.
Россия қуролли кучлари бош штаби бошлиғи Валерий Герасимов туркиялик ва эронлик ҳамкасблари — Хулуси Ақар ва Муҳаммад Багирийга Сурияда биргаликда олиб борилаётган ишлар учун миннатдорлик билдирди.
«Биргаликдаги саъй-ҳаракатларимиз билан Сурияда кўп натижаларга эришдик», — деди у.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)