Саудия Арабистонига сафари вақтида ўз истеъфоси ҳақида баёнот берган Ливан бош вазири Саъд Ҳаририй Францияга келди. Бу ҳақда «РБК» хабар бермоқда.
Associated Press ахборотига кўра, у хотини билан бирга учиб келган, улар Париждаги ўз уйига жойлашган. Агентликнинг қайд этишича, кейинроқ Ҳаририйнинг Франция президенти Эмманюел Макрон билан учрашуви ҳам бўлиб ўтиши мумкин.
Айнан Макрон Ҳаририйни Францияга таклиф қилган эди. Франция президенти Ливандаги эронпараст ва саудияпараст кучлари ўртасидаги музокараларда, низо келиб чиқмаслиги учун, воситачи вазифасини ўз зиммасига олиши мумкин.
Ҳаририй 3 ноябрь куни, Саудия Арабистонига келганидан бир кун ўтиб, Ливан бош вазири лавозимини тарк этишини эълон қилган эди. Бош вазир Ливан президенти Мишель Аунга қўнғироқ қилиб, ўз қароридан уни хабардор қилган.
Ҳам Ливан, ҳам Саудия Арабистони фуқароси ҳисобланган Саъд Ҳаририй «шиаларнинг ‘Ҳизбуллоҳ’ партиясидан фойдаланган ҳолда Эрон ва унинг гумашталари томонидан Ливан ички ишларига аралашув»дан хавотирда эканини билдирган эди.
Бундан ташқари, Ҳаририй ўз ҳаёти учун ҳам хавотирда экани, Ливандаги ҳозирги вазият 2005 йилгисига ўхшаб кетишини таъкидлаган эди. 2005 йили ўша вақтда бош вазир сифатида ишлаб келаётган унинг отаси Рафиқ Ҳаририй суиқасд оқибатида ўлдирилган эди.
Ливан президенти бош вазирнинг истеъфосини қабул қилмади. Кейинроқ Мишель Аун Ливан бош вазири Саудия Арабистони раҳбарияти томонидан куч билан ушлаб турилгани ҳақида баёнот берди. Бироқ бу фикрни Ҳаририйнинг ўзи ҳам, Саудия расмийлари ҳам рад этди.
Изоҳ (0)