Шавкат Мирзиёев Сергелидаги Хусусий уй-жойларга хизмат кўрсатувчи профессионал бошқарув компанияси фаолияти билан танишди

Сергели тумани 6-А массивида Хусусий уй-жойларга хизмат кўрсатувчи профессионал бошқарув компанияси иш бошлади, деб хабар берди ЎзА.

Ўзбекистон Президенти Шавкат Мирзиёевга Сергели туманидаги ташрифи доирасида мазкур хизмат кўрсатиш маркази фаолияти ҳақида маълумот берилди.

Бугунги кунда кўп уйларни ўзида бирлаштирган йирик ширкатлар оптималлаштирилиб, хусусий уй-жой мулкдорлари ширкатлари ва профессионал бошқарув компаниялари ташкил этилмоқда.

Бошқарув компаниясида аҳолига сифатли коммунал хизмат кўрсатиш учун барча шароит яратилган. 40 дан ортиқ ходим уй-жой фондини асраш ва малакали хизмат кўрсатиш борасида меҳнат қилмоқда. Компания 8 та махсус техникага эга бўлиб, массивдаги барча юмушларни бажаради. Массивда 5 та чиқинди йиғиш пункти ташкил этилган. Уларни компанияга тегишли техника воситалари ташиб кетади.

Бу ерда мулкдорларнинг кундалик юмушларини бажариш учун барча соҳалар бўйича мутахассислар фаолият олиб бормоқда. Ҳовлиларга ўрнатилган чироқлар, йўлаклардаги озодалик, дарахтлар ва гуллар доимий назоратда, ҳар бир уй кузатув камералари билан таъминланган.

Компания қошида «Ипотека банк»нинг Сергели филиали 12-жамғарма кассаси фаолияти йўлга қўйилган.