Ўзбекистон ички ишлар вазири Пўлат Бобожоновнинг маълум қилишича, 4 яшар қизини калтаклаган собиқ милиционер Ҳ.Абдураҳмонов «ўз қусурлари учун» ишдан четлатилган. Вазирнинг интервьюси ЎзА томонидан эълон қилинди.
«Яқинда тўрт ёшли қизчасини аёвсиз калтаклаб, таҳқирлаган одам ҳақида ҳамма эшитди. Бундай тубанликни амалга оширган шахс шундай қусурлари учун соҳадан четлатилган собиқ ички ишлар ходими бўлиб чиқди», — деди вазир.
«Халқнинг тинч ва хотиржам ҳаёти учун масъул бўлган ички ишлар органлари ходимларидан касбга садоқат, фидойилик талаб этилмоқда. Бундай юксак инсоний фазилатлар, албатта, ҳар жиҳатдан етук, маънан баркамол ходимлардагина бўлиши сир эмас», — дея қайд этди Пўлат Бобожонов.
Вазирнинг тан олишича, кўрилаётган изчил чора-тадбирларга қарамай, «айрим ички ишлар ходимларининг қўпол муомала қилиши, вақтида ёрдамга етиб келмаслиги, таъмагирлиги, жиноятларни хаспўшлаши ҳолатлари учраб турибди».
Аввалроқ, Ҳ.Абдураҳмонов оталик ҳуқуқидан маҳрум этилгани ҳақида хабар берилган эди. У 4 яшар қизини калтаклаётгани акс этган видео «Ўзбекистон» телеканалининг «Учбурчак» ток-шоусида намойиш этилганидан сўнг, ҳодиса кенг жамоатчиликка маълум бўлиб, шов-шувга айланган эди.
Изоҳ (0)