Хабар беришларича, мазкур ҳолат юзасидан октябрь ойида Абдураҳмоновнинг турмуш ўртоғи томонидан Чилонзор туман прокуратурасига мурожаат келиб тушган. Аёл ўз мурожаатида унинг эри фарзандларига нисбатан ҳаддан ташқари қўпол муносабатда бўлиши, уларни ҳақорат қилиб, қийнаши, 4 яшар қизининг юзи ва танасининг бошқа жойларига урганини қайд этиб ўтган.
Тезкор-тергов ҳаракатлари олиб борилгач, 30 октябрь куни Жиноят кодексининг 110-моддаси 2-қисми «а» ва «в» бандлари (вояга етмаган ва ожиз аҳволдалиги айбдорга аён бўлган шахсга нисбатан муттасил равишда дўппослаш ёки бошқача ҳаракатлар билан қийнаш) аломатлари жиноят иши қўзғатилган.
Тергов давомида болаларга нисбатан қўпол муносабатда бўлиш ҳолатлари психологлар ва бошқа мутахассисларни жалб этиб ўрганилган ва ўз тасдиғини топган. Абдураҳмоновга нисбатан қамоққа олиш эҳтиёт чораси қўлланилган. Бундан ташқари, суд-техник экспертизаси белгиланган бўлиб, унинг якунлари бўйича Абдураҳмоновнинг телефонидаги ахборот ва материаллар ўрганилади.
Қизалоқ ва унинг акасининг психологик, эмоционал ва руҳий ҳолатини, шунингдек, тан жароҳатлари даражаси ва сабабларини ўрганиш мақсадида сайёр комплекс суд-тиббий экспертизаси ўтказилган.
Фуқаролик ишлари бўйича Учтепа туманлараро судининг 19 октябрдаги қарори билан болалар она тарбиясига берилган ва айни вақтда онасининг қарамоғи остида қолмоқда.
31 октябрь куни Чилонзор туман прокурори фуқаролик ишлари бўйича Учтепа туманлараро судига ўз фарзандларига жисмоний куч ишлатиб, руҳий босим ўтказгани, уларнинг саломатлиги ва ҳаётига хавф солувчи жиноятни қасддан содир этгани учун Абдураҳмоновни оталик ҳуқуқидан маҳрум этиш ҳақида тақдимнома берган. Ушбу тақдимнома қаноатлантирилган. Ҳозирги вақтда мазкур иш бўйича тергов давом этмоқда.
Тошкент шаҳар ИИББ бошлиғи ўринбосари, Тергов бошқармаси бошлиғи Дониёр Тошхўжаевнниг тасдиқлашича, Абдураҳмонов ҳақиқатан ҳам муқаддам ички ишлар органларида ишлаган, бироқ жиноят иши қўзғатилиши арафасида вазифасидан озод этилган эди.
Эслатиб ўтамиз, 4 яшар қизчанинг отаси томонидан калтакланиши ушбу ҳодиса акс этган видео «Ўзбекистон» телеканалининг «Учбурчак» ток-шоусида намойиш этилганидан сўнг кенг оммага маълум бўлган ва шов-шувга айланган эди.
Изоҳ (0)