Bonhams кимошди уйи савдосида дунёдаги энг қиммат француз автомобилларидан бири — Peugeot L45 Grand Prix Two-Seater’нинг 1914 йилги нусхаси сотилди. Индианаполисдаги автодром пойгаларида иштирок этган машина 7 миллион 260 минг долларга харид қилинди, деб хабар берди «Мотор».
Дастлабки нархи бир миллион доллардан бошланган Pejo пойга машинасининг кузови ҳамда куч қурилмалари оргиналлигича сақланиб қолинган. Автомобиль 112 от кучини тақдим эта оладиган 4,5 литр ҳажмга эга тўрт цилиндрли двигатель билан жиҳозланган.
Тахминларга кўра, ушбу машина шу кунга қадар сақланиб қолган Л45 моделининг иккита нусхасидан бири ҳисобланади. Пойга машинасига тўрт кишигина эгалик қилган, улар: Pejo компаниясининг ўзи (машина 1914 йилда Лионда бўлиб ўтган пойгада компания захирасида сақланган), пойгачи Ральф Малфорд (1916 йилда Индианаполисда унинг ёрдамида 3-ўринни қўлга киритган), пойгачи Арт Кляйн (1919—1920 йилларда пойгаларда қатнашган), шунингдек, америкалик бизнесмен Линдлей Ботсуэлл (машина 1949 йилдан буён унинг коллекциясида сақланган).
Ботсуэлл машинани сотиб олганидан сўнг, Индианаполисга йўл олган ва соатига ўртача 166 километр тезликда ҳаракатланиб, тўрт доирани босиб ўтган. Шундан кейин 2003 ва 2011 йилда Pejo Гудвудда тепаликка чиқиш пойгасида иштирок этган.
Изоҳ (0)