Тошкент вилоятининг Зангиота туманида истиқомат қилувчи 18 ёшли Асилбек Ғуломов гиёҳванд моддалар сабаб икки йилга озодликдан маҳрум этилди. Бу ҳақда ЎзА хабар бермоқда.
Хабар беришларича, у 11 май куни оғирлиги 2,16 грамм бўлган марихуана билан қўлга тушган. Тергов жараёни давом этаётган вақтда, 9 сентябрь куни эса унинг сумкасидан 5 грамм канабис мойи топилган.
Қайд этишларича, Асилбек биринчи марта қўлга тушганидан сўнг, у наркология диспансерида текширувдан ўтган ва у гиёҳвандликдан мажбурий тартибда даволанишга муҳтожлиги аниқланган.
Тошкент шаҳар Олмазор тумани жиноят ишлари бўйича судининг Шайхонтоҳур транспорт касб-ҳунар коллежида бўлиб ўтган сайёр мажлиси Асилбек Ғуломов билан боғлиқ ҳолат ҳам кўриб чиқилган.
Мажлисда айбланувчининг хулқи, жамоат жойларида ўзини қандай тутиши, шунингдек, ёши, оилавий аҳволи инобатга олинди. А.Ғуломовнинг гиёҳванд моддага ружу қўйганлиги ва очиқ ҳолатда даволаниш имкониятини суистеъмол қилгани сабаб, унга нисбатан суд томонидан Жиноят кодексининг тегишли моддалари билан айблов қўйилди.Кодекснинг 57-моддаси қўлланган ҳолда унга икки йил муддатга озодликдан маҳрум қилиш жазоси тайинланди. Бу даврда белгиланган мажбурий турдаги даволаниш чора-тадбирлари ҳам амалга оширилади.
Мусо Юсупов, Олмазор тумани жиноят ишлари бўйича судининг судьяси
Изоҳ (0)