Инҳа университети Joongang Daily нашри томонидан чоп этилган Жанубий Корея олий ўқув юртлари рейтингида 10-ўриндан 8-ўринга кўтарилди. Рейтингдан 189 университет жой олган, дея хабар бермоқда Ўзбекистон Ахборот технологиялари ва коммуникацияларини ривожлантириш вазирлиги ахборот хизмати.
Хабар беришларича, Joongang Daily’нинг университетлар рейтинги Жанубий Корея олий ўқув юртлари учун бошқа халқаро рейтинглардан муҳимроқ ва улар бу рейтингдаги натижаларини мунтазам яхшилаб боришга интилади.
Янги рейтингда Жанубий Кореядаги Инҳа университети 182 балл билан 8-ўринни эгаллади. Ўтган йили университет 177 балл билан 10-поғонада эди. Қайд этиш жоиз, Инҳа университети 2014 йилдан бери ушбу рейтингда 14-ўриндан 8-ўрингача кўтарилишга эришди.
Инҳа университети аксарият кўрсаткичлар бўйича биринчи ўнликдан ёки унга яқин поғонадан жой олди. Мисол учун, университет «Талабаларнинг ўзлаштириши» кўрсаткичи бўйича 3-ўринни эгаллади. «Ходимларни ишга олиш учун тавсия қилинадиган университет» ва «Мактабни битиргач, ўқиш учун энг яхши университет» бўйича кўрсаткичларда 6-ўринни эгаллади.
Эслатиб ўтамиз, 2014 йили Тошкентда Жанубий Кореядаги Инҳа университетининг филиали — Тошкентдаги Инҳа университети (IUT) очилган. Ҳозирда Тошкентдаги муассаса ёшларга «Компьютер ва дастурий инжиниринг» ва «Логистика» йўналишлари бўйича ўқув дастурларини таклиф этмоқда.
Изоҳ (0)