Ўзбекистон Президенти Шавкат Мирзиёев 9 ноябрь куни АҚШ президенти маслаҳатчиси ўринбосари, Миллий хавфсизлик кенгашининг Жанубий ва Марказий Осиё бўйича катта директори Лиза Кёртисни қабул қилди, дея хабар бермоқда ЎзА.
Кёртис 10—11 ноябрь кунлари Самарқанд шаҳри мезбонлик қиладиган «Марказий Осиё: ягона тарих ва умумий келажак, барқарор ривожланиш ва тараққиёт йўлидаги ҳамкорлик» мавзуидаги халқаро конференцияда иштирок этиш учун мамлакатимизга келган АҚШ делегациясига бошчилик қилмоқда.
Шавкат Мирзиёев меҳмонни самимий қутлар экан, ҳозирги вақтда Ўзбекистон—Америка мулоқоти амалий ҳамкорлик руҳида барқарор ривожланиб бораётганини қайд этди.
Учрашувда хавфсизлик ва барқарорликни таъминлаш мақсадида Афғонистон ва бутун минтақадаги вазият бўйича фикр алмашилди.
Томонлар Марказий Осиё тенг ҳуқуқли ва ўзаро ҳамкорлик ҳудуди бўлиб қолишидан манфаатдор эканини таъкидлади.
«Шу маънода, Ўзбекистон раҳбариятининг яхши қўшничилик алоқаларини кенгайтириш ва минтақа мамлакатлари ўртасида ўзаро ишончни мустаҳкамлашга қаратилган ташаббуслари ва амалий қадамлари муҳим аҳамиятга эга экани қайд этилди», — дейилади ЎзА ахборотида.
Лиза Кёртис АҚШ раҳбарияти Ўзбекистоннинг минтақавий хавфсизлик ва барқарорликни мустаҳкамлашда тутган ўрнини юксак қадрлашини таъкидлади.
Америка Қўшма Штатлари Ўзбекистон билан узоқ истиқболга мўлжалланган муносабатларни янги босқичга кўтаришдан манфаатдор эканини қайд этди.
Изоҳ (0)