«Коммерсантъ»: Украина Россия билан дипломатик алоқаларни узишга тайёр

«Коммерсантъ» нашри Украинанинг Россия билан дипломатик алоқаларини узишга тайёрлигидан хабар топди, деб ёзади «Ведомости».

Россия билан дипломатик алоқаларни узиш ҳақидаги банд «Донбассни реинтеграция қилиш тўғрисида»ги қонунга тузатиш сифатида киритилган, у 16 ноябрь куни иккинчи ўқишда кўриб чиқилади. Унинг муаллифи ҳукмрон «Пётр Порошенко блоки»дан депутат Иван Винник бўлиб, у амалда парламентнинг миллий хавфсизлик ва мудофаа қўмитаси раҳбари Сергей Пашинский етакчилик қиладиган «Халқ фронти» билан ҳамкорлик қилади. Қонун айнан унинг қўмитаси орқали ўтади. Айнан «Халқ фронти» тузатиш ташаббускоридир, дея даъво қилади нашр манбаси.

«Донбассни реинтеграция қилиш тўғрисида»ги қонунда «Россия тажовузкор мамлакат деб эътироф этилади, умид қиламанки, овозлар йиғилади. Ва бундан кейин дипломатик алоқаларни сақлаб қолиш — Украина ТИВ томонидан жиноят бўлади. Бу муносабатлар аллақачон узилган… Биз ушбу узилишни қонун чиқарувчилик даражасида мустаҳкамлашимиз керак», — дея ўз мақсадини тушунтирди тузатиш муаллифи.

Россия билан муносабатларни узиш Украина президенти Пётр Порошенконинг режаларига кирмаган. Нашр суҳбатдошлари фикрича, тузатиш — ички ишлар вазири Арсен Аваковнинг Порошенкога ўзига хос жавобидир. 31 октябрь куни Аваковнинг ўғли Александр Миллий гвардия учун рюкзаклар сотиб олишда 520 минг долларни сарфлаб юборганликда гумонланиб ҳибсга олинган, кейинроқ қўйиб юборилган эди.