Қозоғистон Республикаси Костанай вилояти ИИДнинг уюшган жиноятчиликка қарши курашиш бошқармаси ходимлари одам савдосида гумонланган, Қарағандада истиқомат қилувчи 36 ёшли эркакни қўлга олди. Туман Ички ишлар департаменти матбуот-хизматининг маълум қилишича, эркак 18 нафар Ўзбекистон фуқаросини апрель ойидан бери қулликда ушлаб турган, деб хабар берди BNews.
«Ўтказилган тезкор-қидирув тадбири давомида хусусий ташкилотга тегишли биноларнинг бирида 18 нафар Ўзбекистон фуқароси борлиги аниқланди. Полициячиларнинг аниқлашича, ушбу фуқаролар жорий йилнинг апрелидан буён хусусий тадбиркор қўлида ноқонуний ишлаб келган. Эркак ёлғон ва таҳдидлар орқали уларни тегирмонда ишлатган. Гумонланувчи эркак жабрланувчиларнинг ҳужжатларини олиб қўйганлиги ва меҳнатига пул тўламаганлиги сабаб улар мамлакатдан чиқиб кета олмаган», — дейди Костанай вилояти ИИД.
Вилоят полициясининг айтишича, Ўзбекистон фуқаролари инсон савдоси жабрдийдаси деб топилгани учун иммиграция тўғрисидаги қонун ҳужжатларини бузганлик учун маъмурий жавобгарликка тортилмайди.
Улар айни вақтда полиция ва жамоат ташкилотлари ҳимояси остида.
Изоҳ (0)