Каталониянинг истеъфога чиқарилган раҳбари Карлес Пучдемон Брюсселдан Барселонага қайтмаган. Бу ҳақда Каталония пойтахтидаги халқаро аэропортнинг маълумотларига асосланиб, «РИА Новости» хабар бермоқда.
Аввалроқ, айрим оммавий ахборот воситаларида Пучдемоннинг Барселонага қайтаётгани маълум қилинган эди.
29 октябрь, якшанба куни Пучдемон ва унинг маҳкамасининг етти нафар собиқ ходимлари Брюсселга жўнаб кетди.
30 октябрь куни Брюсселдаги матбуот анжуманида чиқиш қилган Пучдемон ўзига нисбатан таҳдидлардан қочиш учун Бельгияга келганини айтган эди. У айни вақтда йўқ бўлган «кафолатлар» берилганидагина Каталонияга қайтишини таъкидлади.
Барселонага кечки рейс билан камида икки сиёсатчи—ички ишлар кенгашининг собиқ раҳбари Жоаким Форн ва меҳнат ва ижтимоий масалалар бўйича собиқ давлат маслаҳатчиси Долорс Басса учиб келган.
Маълумотларга кўра, Пучдемон ўз маслаҳатчилари билан Брюсселда қолган.
Мавзуга доир: Карлес Пучдемон Бельгияда сиёсий бошпана сўрамайди
Изоҳ (0)