Сирдарёда аёл кишининг J5 телефонини тортиб олган талончи-рецидивист қўлга олинди

Сирдарё вилоятида талончилик ҳолати фош этилди, деб хабар берди «Дарё»га вилоят ИИБ матбуот хизмати.

«28 октябрь куни Сирдарёнинг Ширин шаҳри ИИБга ариза билан Н. Ҳамидова мурожаат қилиб, 27 октябрь куни соат 22:50 да танишиникидан чиқиб Ширин шаҳар ҳудуди бўйлаб Гулистон шаҳрига кетиш мақсадида автомашиналар шоҳбекатига кичик кўча бўйлаб кетаётган вақтида номаълум шахс маст ҳолда унга гап отганлигини таъкидлади», — дейилади хабарда.

Н. Ҳамидова унинг гапларига жавоб бермасдан йўлида давом этган вақтида номаълум шахс қўлидан нархи 1,5 миллион сўмлик Samsung Galaxy J5 русумли уяли телефон аппаратини тортиб олиб, воқеа жойидан қочиб кетди.

Ширин шаҳар ИИБ ходимларининг олиб борилган тезкор-тергов тадибири давомида мазкур жиноятни 40 ёшли Наманган вилоятидан келган Б. Муҳаммедов содир этилганлиги аниқланиб, ундан Н. Ҳамидовага тегишли Galaxy J5 русумли уяли телефон аппарати олинди ва жабрланувчига қайтариб берилган.

Ҳолат юзасидан Н. Муҳаммедовга нисбатан ЖКнинг 166-моддаси (талончилик) билан жиноят иши қўзғатилиб тергов ҳаракатлари олиб борилмоқда.

Жиноят содир этган шахс муқаддам қасддан баданга енгил шикаст етказиш жиноятини содир қилгани аниқланди.