23—27 октябрь кунлари Тошкентда Германия халқаро ҳамкорлик жамияти томонидан семинар ташкил этилди

23—27 октябрь кунлари Тошкент шаҳрида соҳага оид вазирликлар ва идоралар вакиллари учун «Сув ҳавзалари режалари ҳамда сув ҳавзаларини режалаштириш инструментларини ишлаб чиқиш салоҳиятини институционал мустаҳкамлаш ва ривожлантириш» мавзусида семинар бўлиб ўтди. Германия халқаро ҳамкорлик жамияти (GIZ) ташкил этган ушбу анжуманга молиявий кўмак Европа Иттифоқи томонидан таъминланган бўлса, Марказий Осиё минтақавий экологик маркази (CAREC) экспертлик ёрдамини берди. Бу ҳақда ташкилотчилар «Дарё»га маълум қилди.

Семинар ЙИ томонидан молиялаштирилаётган «Сув хўжалигини бошқариш ва сув ресурсларини интеграллашган тарзда бошқариш бўйича миллий ҳошиявий концепция. 1-Компонент» лойиҳаси доирасида ташкил этилган. Мазкур лойиҳанинг миллий ҳамкори – Ўзбекистон Республикаси Қишлоқ ва сув хўжалиги вазирлигидир.

Маълумот учун, 1-Компонент «Ўзбекистон Республикасининг қишлоқ ҳудудларида сув ресурсларидан барқарор фойдаланиш» дастурининг бир қисмидир. Ушбу дастур учта компонентдан иборат бўлиб, Европа Иттифоқи томонидан молиялаштирилмоқда. Биринчи Компонент «Сув хўжалигини бошқариш ва сув ресурсларини интеграллашган тарзда бошқариш бўйича миллий ҳошиявий концепция» лойиҳасидан иборат бўлиб, лойиҳа GIZ томонидан амалга оширилмоқда.