23—27-oktabr kunlari Toshkent shahrida sohaga oid vazirliklar va idoralar vakillari uchun “Suv havzalari rejalari hamda suv havzalarini rejalashtirish instrumentlarini ishlab chiqish salohiyatini institutsional mustahkamlash va rivojlantirish” mavzusida seminar bo‘lib o‘tdi. Germaniya xalqaro hamkorlik jamiyati (GIZ) tashkil etgan ushbu anjumanga moliyaviy ko‘mak Yevropa Ittifoqi tomonidan ta’minlangan bo‘lsa, Markaziy Osiyo mintaqaviy ekologik markazi (CAREC) ekspertlik yordamini berdi. Bu haqda tashkilotchilar “Daryo”ga ma’lum qildi.
Seminar YI tomonidan moliyalashtirilayotgan “Suv xo‘jaligini boshqarish va suv resurslarini integrallashgan tarzda boshqarish bo‘yicha milliy hoshiyaviy konsepsiya. 1-Komponent” loyihasi doirasida tashkil etilgan. Mazkur loyihaning milliy hamkori – O‘zbekiston Respublikasi Qishloq va suv xo‘jaligi vazirligidir.
Ma’lumot uchun, 1-Komponent “O‘zbekiston Respublikasining qishloq hududlarida suv resurslaridan barqaror foydalanish” dasturining bir qismidir. Ushbu dastur uchta komponentdan iborat bo‘lib, Yevropa Ittifoqi tomonidan moliyalashtirilmoqda. Birinchi Komponent “Suv xo‘jaligini boshqarish va suv resurslarini integrallashgan tarzda boshqarish bo‘yicha milliy hoshiyaviy konsepsiya” loyihasidan iborat bo‘lib, loyiha GIZ tomonidan amalga oshirilmoqda.
Izoh (0)