Тошкентда куёв ўзидан 14 ёш катта қайнотасини дўппослади. Энди у беш йилга қамалиши мумкин

Тошкентда ўз қайнотасини дўппослаган куёв беш йилгача озодликдан маҳрум этилиши мумкин. Бу ҳақда «Telegraf.uz» хабар бермоқда.

Юнусобод туманида истиқомат қилувчи 1988 йилда туғилган йигит тунда 1996 йилда туғилган рафиқаси билан жанжаллашиб қолган.

Хабар беришларича, низога аниқлик киритиш мақсадида йигитнинг хонадонига келган 1974 йилда туғилган қайнота билан ҳам келишмовчилик юзага келган.

Оқибатда куёв ўз қайнотасини ҳақорат қилади, унинг юзи, боши ва танасининг бошқа қисмларига уриб, дўппослаб, унга тан жароҳати етказади.

Қайд этишларича, ҳолат юзасидан Жиноят кодексининг 105-моддаси («Қасддан баданга ўртача оғир шикаст етказиш») 2-қисми «к» банди билан жиноий иш қўзғатилган.

Маълумот учун, мазкур модда бўйича айбланувчилар уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланади.