Наманган шаҳар Сардоба бозоридаги дўконлардан бирида олинган сурат Facebook’да муҳокамаларга сабаб бўлди. Суратда бозор ҳудудидаги 177-дўкон унинг сотувчилари пахта йиғим-теримига чиқмагани учун муҳрлаб қўйилгани акс этган.
«‘Сардоба бозори’ масъулияти чекланган жамияти ҳудудидаги 177-сонли дўкон сотувчилари пахта йиғим-теримида иштирок этмаганлиги сабабли, 2017 йилнинг 23 октябрь куни муҳрланди», — дейилади дўкон эшигига ёпиштирилган муҳрли ҳужжатда.
Унга бозор раҳбари Абдуғаффорвнинг имзоси қўйилган бўлиб, дўкон Абдуғаффоровнинг рухсатисиз очилиши мумкин эмаслиги таъкидланган. Дўкон неча кунга муҳрлангани кўрсатилмаган, деб ёзади «Kun.uz».
Маълумот учун, пахта йиғим-терими мавсуми арафасида Наманган вилояти ҳокими Хайрулло Бозоров 2017 йилда шифокорлар ва ўқитувчилар теримга чиқмаслигини айтган эди.
Қайд этиш жоиз, тадбиркорлар ва сотувчиларнинг теримга чиқиш-чиқмаслиги ҳақида бирор гап айтилмаган эди. Улар айнан қайси қонуний талаб асосида пахта теримига чиқиши кераклигига вилоят ҳокимлиги аниқлик киритмаган.
Изоҳ (0)