19 октябрь куни Хитой озиқ-овқат маҳсулотлари ва дори воситалари устидан назорат қилиш давлат бошқармаси томонидан «Эбола вирусига қарши қайта комбинация қилинган янги вакцина» маъқулланди. Бу ҳақда Kazakhstan Today хабар бермоқда.
Вакцина Хитой томонидан мустақил равишда ишлаб чиқилган бўлиб, унинг муаллифлик ҳуқуқи мазкур мамлакатга тегишли.
Эбола вирусига қарши қайта комбинация қилинган вакцина ҳарбий-тиббий фанлар академияси ва CаnSinо биологик компанияси томонидан ишлаб чиқилди.
Хитой бу сафар вакцинани маъқуллаш билан бирга иммунитетни мустаҳкамлаш усулларини ҳам ўрганди. Эболага қарши янги вакцина кукун шаклида бўлиб, у Цельсий шкаласи бўйича 37 даражагача ҳароратда таъсир кучини сақлаб қолиш имконини беради.
Хитой АҚШ ва Россиядан кейин хавфли Эбола вирусига қарши вакцина ишлаб чиққан учинчи давлат бўлди.
Хитойнинг кукунсимон вакцинаси хорижий давлатларнинг суюқ препаратлари билан солиштирилганда транспортда ташиш ва юқори ҳароратда фойдаланиш юзасидан қулайликларига эга.
Эбола вируси илк марта 1976 йилда аниқланган эди. Уч йил аввал Ғарбий Африкада Эбола эпидемияси тарихидаги энг хавфли ҳолат қайд этилди. Вирус 11,3 минг нафар кишининг ҳаётига зомин бўлди.
Изоҳ (0)