12 октябрь куни «Ўзбекконцерт» давлат муассасасида Ўзбекистон халқ артистлари клубининг навбатдаги йиғилиши бўлиб ўтди. Бу ҳақда муассаса расмий сайтида хабар берилди.
Ўзбекистон халқ артисти Фаррух Зокиров раислигидаги ушбу йиғилишда Клубнинг асосий вазифалари, чора-тадбирлари кенг муҳокама қилинди. Бунда истеъдодли ёш хонандаларнинг касбий ва маънавий камол топишига имкон яратиш, уларнинг малака ошириши, тарбиялаш, шоир-бастакор-ижрочи учлигини доимий ҳамкорликда иш олиб боришларига кўмаклашиш, ўз иқтидорини намоён этиши учун зарур ташкилий масалаларни ҳал этиш, бозор муносабатлари шароитида яккахон ижрочилар ва ижодий жамоалар фаолиятига кўмаклашишга доир вазифалар ҳақида фикр юритилди.
Клубнинг ҳар бир аъзосига Клуб низоми тарқатма материал сифатида тарқатилди.
Шу билан бирга Ўзбекистон Республикаси Конституцияси қабул қилинганлигининг 25 йиллигини кенг нишонлашга бағишланган тадбирлар доирасида Ўзбекистон халқ артистлари иштирокида гала-концерт ташкил этиш таклифи бир овоздан маъқулланди.
Шунингдек Ўзбекистон Республикаси Вазирлар Маҳкамасининг «пахта йиғим-теримида қатнашаётган ҳашарчиларга маданий хизмат кўрсатиш тўғрисида»ги баёни ижросини таъминлаш юзасидан концерт тадбирларини ташкил этиш бўйича кўрсатмалар берилди.
Йиғилишда Клуб аъзолари билан биргаликда тажрибали Ўзбекистонда хизмат кўрсатган артистлар, «Ниҳол» мукофотининг совриндорлари, «Ўзбекконцерт» давлат муассасаси ходимлари ҳамда оммавий ахборот воситалари вакиллари иштирок этди.
Изоҳ (0)