Ижтимоий тармоқларда Тошкентдаги шоҳ кўчалардан бирининг деярли ярмини такси тўхтатиш мақсадида эгаллаб олган пиёдалар устига машина ҳайдаган ҳайдовчининг видеоси пайдо бўлди. Видеоёзув пиёдалар устига босиб борган машинага ўрнатилган видеорегистратор ёрдамида олинган. Унда ҳайдовчининг бақир-чақири, шунингдек, уни тинчлантиришга уринаётган дўстларининг ҳам овози эшитилади.
Видеода Бунёдкор шоҳ кўчасининг Чилонзор буюм бозори олдида 1 октябрь куни юзага келган вазият кўрсатилган. Унда пиёдаларнинг жуда катта гуруҳи йўл ҳаракати қоидаларига хилоф равишда такси тўхтатиш мақсадида йўлнинг ярмини эгаллаб олгани, оқибатда тирбандлик келиб чиққанини кўриш мумкин. Бундан норози бўлган ҳайдовчи автомобиль сигналини чалгани ҳолда, машинани пиёдалар устига ҳайдаб, йўлнинг битта ҳаракатланиш бўлагини одамлардан «тозалаб» кетаверган. Бу ҳодиса йўл-патруль хизмати ходимлари гувоҳлигида юз берган. Ҳодиса оқибатида ҳеч ким жисмонан жабрланмаган.
Мазкур вазиятда пиёдаларнинг ҳаракатини ҳам, уларни гўёки тартибга солишга уринган ҳайдовчини ҳам оқлаб бўлмайди. Масалан, ҳайдовчининг кескин ҳаракатлари Маъмурий жавобгарлик тўғрисидаги кодекс (МЖтК)нинг 128-5-моддаси 2-қисми билан таснифланиб, ҳайдовчи энг кам иш ҳақи (ЭКИҲ)нинг ўн баравари (14 октябрь ҳолатига кўра — 1 497 750 сўм) миқдорида жаримага тортилиши мумкин. Айни вақтда, пиёдаларнинг белгиланмаган жойда йўлнинг ҳаракат қисмига чиқиб кетгани уларнинг ҳар бирига МЖтКнинг 138-моддаси 1-қисми билан ЭКИҲнинг учдан бир қисми (49 925 сўм) миқдорида жарима солишга асос бўлиши мумкин.
Шу сабабли, ижтимоий тармоқ фойдаланувчилари ҳам икки гуруҳга бўлинган — баъзилар ҳайдовчининг қилган ишини оқлаган, бошқалар пиёдаларга ачинган. «Ҳайдовчи руҳий носоғлом шекилли, у ҳеч ҳурматга лойиқ иш қилмаган — одамларни сўкишга нима ҳақи бор? Жума кунлари масжидлар олдида машиналарни 2-3 қаторлатиб қўйишади, ҳеч ким ҳеч нима демайди, ҳамма ҳурмат билан ўтади. Бу ерда ҳайдовчи бошқаларга ўхшаб индамай ўтса ҳам бўларди», — деб ёзади фойдаланувчилардан бири.
«Нимани қойил қилибди бу ҳайдовчи? Одамларни ҳақоратлаб, машинасини уларнинг устига ҳайдаганими қаҳрамонлиги? Машинадан тушиб гапирсин эди, ўша ерда турган йўл назоратчиларига эътироз билдирсин эди! Қўрқадими? Агар шу ерда ёш катта онангиз ё ҳомиладор аёлингиз, ёш болали синглингиз бўлса, мана шу ‘қаҳрамонънинг шу ишига ўшанда ҳам ҳозиргидек қойил қолармидингиз?», — деб савол қўйган бошқа бир фойдаланувчи.
Ҳайдовчининг ҳаракатини маъқуллаган фойдаланувчилардан бири (улар жуда кўп) бу фикрга жавоб қайтарган: «Аввало, ўзини ҳурмат қилган инсон кекса онасини бир ўзини, ҳомиладор аёли ё ёш болали синглисини бозорга туширмайди. Ундан кейин, пиёдалар ўз ҳаётини хавф остига қўймай, белгиланган жойдан ўтиши керак. Худо кўрсатмасин, биров уни уриб юборса, тамом — ҳайдовчининг қарамоғига ўтиб қолади. Савияни фақат ҳайдовчилар эмас, йўл қоидасига риоя этмаётган пиёдалар ҳам ошириб борса, қандайдир натижага эришган бўлардик. Қарс икки қўлдан чиқади».
Фойдаланувчилардан яна бири эътиборга молик фикр ёзиб қолдирган: «Ҳайдовчи одамларга йўл ҳаракати қоидаларини улар тушунадиган тилда ўргатмоқда».
Изоҳ (0)