Фарғона вилоятида истиқомат қилувчи тадбиркор Ҳаж сафари учун аёли билан бирга тўплаган 44 миллион сўм пулини қишлоқ учун қудуқ қаздириб, сув минораси қуришга сарфлади. Бу ҳақда, «Бувайда кўзгуси» газетаси бош муҳаррири Азизахон Солиевага асосланиб, «Sof.uz» хабар бермоқда.
Маълум бўлишича, Мамарасул Камолов ва унинг аёли — Мунаввара Азизова истиқомат қилувчи Бештерак маҳалла фуқаролар йиғинидаги Ўртақишлоқ аҳолиси бир неча йилдан буён ичимлик сувини қўшни Манғит қишлоғидан ташиб келарди. Бундан ташқари, яқин атрофдаги 26-мактаб ва 7-мактабгача тарбия муассасаси ҳам ичимлик суви муаммосидан қийналган.
Мамарасул Камолов ва Мунаввара Азизова Ҳаж зиёратига бориш учун йиллар давомида йиққан 44 миллион сўм маблағини, ўзаро маслаҳатлашиб, қишлоқ учун сув қудуғи қаздириб, сув минорасини ўрнатишга сарфлаган. «Яқинда бу саховатпеша оила бутун қишлоқ аҳлини чақириб, қишлоқларидан ичимлик суви чиққани муносабати билан хайрия оши тарқатди», — деб ёзади Азизахон Солиева.
Маълумот беришларича, Мамарасул Камолов кўп йиллар муҳандис-қурувчи бўлиб ишлаб, нафақага чиққан. Унинг турмуш ўртоғи Мунаввара Азизова эса боғча мудираси бўлиб ишлаган. Улар тўрт фарзандни вояга етказган — уч қизи ўқитувчи сифатида ишлаб келаётган бўлса, ўғли ҳудуддаги кабел ишлаб чиқарувчи фирма директоридир.
«Sof.uz»нинг қайд этишича, бу оила 30 йилдан буён 2 сотих ерида лола гули етиштириб келади. «Шунингдек, намунали оила аъзолари асаларичилик билан ҳам шуғулланади», — деб ёзади интернет-нашр.
Изоҳ (0)