Тошкентда Huawei GT3 смартфони сотувга чиқди

Huawei компанияси Ўзбекистонда GT3 моделини сотишни бошлади, деб хабар берди «Mobinfo.uz».

Ушбу телефон жамоатчиликка 2016 йилнинг июнида тақдим этилган эди ва орадан бир йил ўтгач у Ўзбекистон бозорларида ҳам пайдо бўлди. GT3 смартфонининг техник тавсифи ҳамда дизайни Honor 5C моделига жуда ўхшаш.

Янги моделнинг ўзига хос жиҳати: 5,2 дюймли FHD-дисплей, 64 битли 8 ядроли процессор, 13 ҳамда 8 мегапикселли камера, шунингдек, бармоқ изи сканерининг 2-авлоди. Смартфон кулранг ҳамда тилларангларда сотилмоқда. Телефон корпуси металл ва ойнадан ишланган.

Смарфоннинг тезкор хотираси 2 гигабайтга, ички хотираси эса 16 гигабайтга тенг. Аккумулятор сиғими 3000 мА/соатни ташкил этганлиги сабаб, смартфон ўртача юклама билан 2 кун, юқори юклама билан эса 1,3 кун, «кутиш» режимида 355 соат ишлай олади. Шунингдек, GT3’да Huawei томонидан патентланган Intelligent Power Saving Technology қувват тежовчи технологияси қўлланилган. Шу билан бирга, LTE технологияси, бармоқ изи сканери ҳам мавжуд.

Смартфон Android 6.0 Marshmallow операцион тизимида ишлайди. Huawei GT3 смартфонининг нархи Тошкент савдо марказларида 1 340 000 сўмга баҳоланган.

Номи келтирилган қурилмани кўрсатилган нархда сотиб олишга «Дарё» нашри кафолат бермайди. Қурилмалар ва уларнинг нархлари ҳақидаги ахборот фақат танишиш учун тақдим этилган.