Зангиота туман ИИБга Тошкент шаҳрида яшовчи 1979 йилда туғилган Аҳрор Сатторов ариза билан мурожаат қилган. Аризага кўра, жорий йилнинг 25 сентябрь кунидан 2 октябрь кунигача бўлган вақт оралиғида номаълум шахс, ҳеч ким йўқлигидан фойдаланиб, мазкур фуқаронинг Хонобод қишлоқ фуқаролар йиғини ҳудудида жойлашган қўйхонасидан умумий нархи 18 миллион сўм бўлган 22 бош қўйини ўғирлаган. Бу ҳақда Тошкент вилояти ИИБ хабар берди.
Олиб борилган тезкор чора-тадбирлар натижасида ушбу жиноятни Аҳрор Сатторовнинг уйида ижарада яшаётган андижонлик фуқаро, 1972 йилда туғилган Тўлқинжон Толмасов содир этганлиги ва у қўйларни сотиб юборганлиги аниқланди.
Тўлқинжон Толмасов қўлга олинган. Ушбу ҳолат юзасидан унга нисбатан Ўзбекистон Республикаси Жиноят Кодексининг 169-моддаси билан жиноят иши қўзғатилди. Ашёвий далил сифатида қўйлар олиниб, эгасига қайтарилди.
Жабрланувчининг исми ва фамилияси ўзгартирилган.
Изоҳ (0)