IELTS — International English Language Testing System — инглиз тили бўйича энг машҳур тест имтиҳони бўлиб, ҳар йили жаҳон бўйлаб 3 миллиондан зиёд киши IELTS топширади. IELTS’дан олинган яхши баҳо — имкониятлар эшигига ҳақиқий калит: абитуриент хорижий таълим муассасасига ўқишга қабул қилиниши, чет элга кетиш ниятида фуқаронинг виза олиши осонлашиши мумкин ва ҳоказо.
IELTS имтиҳони — пулли. Унинг қиймати Кембриж университети томонидан белгиланади ва бир киши учун 120 фунтни ташкил этади. Ўзбекистонда IELTS имтиҳонлари Британия Кенгаши ваколатхонаси томонидан ўтказилади ва у имтиҳон ҳақини Марказий банкнинг тўлов кунидаги курси бўйича сўмда қабул қилади.
Ўзбекистонда 5 сентябрдан эркин конвертация жорий этилди — сўм, масалан, долларга нисбатан салкам икки баробар қадрсизланди: 29 августдаги курс бўйича 1 АҚШ доллари қиймати 4210 сўм 35 тийинни ташкил этган бўлса, 5 сентябрдан 8100 сўм этиб белгиланди.
Эркин конвертация тўғрисидаги Президент фармони 2 сентябрь куни эълон қилинди ва бу ҳолат кўпчиликни шошилтириб қўйгани рост. Масалан, мобил алоқа операторлари ҳали ҳам 4210 сўмлик курс бўйича аҳолига хизмат кўрсатишда давом этмоқда; GM Uzbekistan ўз автомобиллари нархини долларнинг расмий курсига «боғлаш»ни тўхтатди.
Британия Кенгаши ҳам 5 сентябрдан 1 октябрга қадар IELTS имтиҳони учун тўловни Марказий банкнинг 29 августдаги курси бўйича қабул қилишда давом этди. Бироқ 1 октябрдан имтиҳон нархи сўмда ўзгарди — Британия Кенгаши сайтида ёзилишича, имтиҳон нархи октябрь ойи охирига қадар 1 296 000 сўмни ташкил этади (курснинг ўзгаришига қараб, ноябрда нарх яна ўзгариши мумкин).Шундай қилиб, имтиҳон нархи сўмда салкам икки баробар ошди — сентябрда 650 минг сўм атрофида бўлган тўлов октябрда салкам 1,3 миллион сўмни ташкил этмоқда. Бироқ Кембриж университети белгилаган нарх — 120 фунт ўзгаришсиз қолган. Шунчаки, доллар билан бирга фунтнинг курси ҳам икки баробарга юқорилади — 29 август куни 5425 сўм 4 тийин бўлган Британия пули 5 сентябрдан кейин 10 495 сўм 17 тийиндан ошса ошяптики, ундан пастга тушаётгани йўқ.
Изоҳ (0)